Thihna Khum

                 Pindan ropui leh nuam tak, bungrua man tam tak a thuam. Lal-in a inhung atan pawh zahpuiawm loh tak vek, man tam leh hlu tak hlir tih hriat hliah hliah inhunna pindanah chuan...

                Putar Kum 80 chuang tawh tur hi khum ropui takah hian chau tih hriat tak, a khawvel, a rosum zawng zawng kalsan inpeih hmel tak hian a lo mu bem a. A kutah chuan nghet takin chanchinbu hlui tawh tak hi a hum tlat bawk a.

                Chu khum ropui tak sirah chuan Putar-a fapa leh a nupui chu lungngai tih hriat tak hian, ngui em em hian an thu dun a. An sir deuhah chuan, khum ngheng chungin chhuatah naupang, a kum phu lo a pumrua lian tak hi phone bih ngur ngur chungin a lo nui tet tet ve thung bawk a.

                Chawhnu her, Ni in tlak lam a pan chhet chhet pah chuan chu pindan ropui chhunga bungruate chu achhun tle sar sar hlom a. Chu pindan chhungah chuan kan mipa naupang phone khawih nui ri leh huk thin thawm leh Putar-a thaw ri hrawk hrawk bak chu thawm dang hriat tur a awm lo.

                TING!  TING! TING! Door Bell chu a rawn ri ral ral a. Putar-a fapa te nupa chu harh zawk ni awm tak hian an phu deuh dawrh a. A nupui chuan zuan zang takin kawngka lam chu a pan nghal a, a fapa chuan Putar-a chu a thlir reng ringawt a.

                Doctor a lo lut a, Putar-a fapa chuan lo chibai turin a thutna atang chuan a lo tho chhuak a. A fapa chhuat a thu chu nek zeuh pah chuan thu tha tur chuan a mit mei a, naupang chuang ngaihsak mang lo hian duhdah deuh tak hian a in siam rem san mai a. Doctor chuan khum sir a drip in khai te chu endik pahin Putar-a chu a han thlek kual vel a, a ban te chu la kangin a han hmet kual vel a, midang chuan an lo thlir thap a. Chutia Doctor in a han sawngbawl kual lai chuan Putar-a chuan Doctor chu hmuh pawh hmu lo niawm tak hian a melh ngai hi a melh reng a, a mit chuan pindan pawn lam daih chu a hmu niawm hian a lang a. Doctor hmel en chuan beiseina a neih vak hmel loh hian a hriat a.

                Putar-a fapa nen chuan Doctor chu pindan lehlamah chuan an inzui phei ta nghal a. Doctor chuan, "Heti ringawt chuan a dik lo, a rang lama damdawiin kan pan pui a tha ka ti." A fapa chuan, "Ni e, kan nupa pawhin chu chu tha kan ti a, mahse amah hian a duh lo bur mai si a, ka U te pahnih lo thleng se, i ho in i rel tha leh ang u hmiang. A tih dan tak poh an hre zawk ang ka U te chuan, an lo thleng har tawh lo ang."

                A sawi pawh a sawi zawh fel hma in, a unaupa te chhungkua chu an lo lut tak tak a, kan mipa naupang khum mawnga phone khawih a thu pawh chuan a unau te lo thleng a hmuh chuan phur tak hian a rawn tlan phei nghal a, an ri chel chul hlawm a. Puitling ho in thawm dim tura an hrilh lai mek chuan Putar-a fanu te nupa pawh an lo lut zui ve nghal a.

                In chibai a, an han in chhawn nak nak hnu chuan, puitling ho chu Putar-a pindan lam ah chuan an lut ta a. A fate lo thleng thar hmel a hmuh pawh chuan Putar-a chu a mitmeng a la danglam chuang lo, a hma ang bawkin pindan pawn lam daih melh hmel hi a pu reng tho a. A fanu chuan a pa chu duat tak hian a han chul a, a chal ah chuan a zuk fawp zeuh a. Naupang ho pindan lehlam a an infiam thawm chu a hriat theih feih feih a. A bak thawm dang a awm lo.

                Fapa upa ber chuan, a rang a rang a damdawiin lama tlan nghal a chu a duh thu sawi pah chuan a ding nghal deuh uk uk a, kal nghal mai tum niawm tak hian. Putar-a fanu ve thung chuan, chutia a pa berin damdawiin a awm a duh tlat si loh chuan senso tam deuh zawk mahse, Doctor leh a puitu tur rawih a, in lama enkawl mai chu tha a tih thu a sawi ve leh a. A fapa naupang ber chuan a nupui kut vuan chungin a pa chu a en ngawih ngawih a. Tih ngaihna a hriatloh thu leh a U te rorel dan apiang chu a pawm thu chiah a sawi a.

                Putar-a chu a rawn khuh kherh kherh a, chau tih hriat tak maiin, thei leh thei lo hian "Bawiha, i lo la danglam reng reng lo anih hi. Thil tha nia i hriat phawt chuan, midang ngaihdan ah i buai ve ngai lo. Tha i tih chu tha a nimai a, i rilru i thlak ve mai mai ngai si lo. I mize nghet chet chawt tak hi chu thlak lo hram ang che." a khuh leh nghal bawrh bawrh a. Midang chuan ngawi rengin an en thap a, a fanu chu a insum tih hriat tak hian a insut feih feih a.

                "Bawihi, nangpawh midang tan hian engmah ui i nei ngai lo kha ania, tun thlengin ka ngaihdan leh duhdan min ngaih pawimawh sak a, hautak leh buaithlak zawkin lang mahse            ka duhdan hnial ai chuan i thlang zawk a la nih hi. I thilphal na leh inhuamna zau tak hi thlak ngai reng reng suh ang che." A melh ngai reng a la melh a, a thaw halh halh a.

                "Naute, i unaute i zah zia hi ka chhuang thei thin asin, i U te rorel i zahthiam zia hi a mawiin a ropui ka ti. I duh dan ngai pawimawh hmasa lo a, midang tana phur taka i inpek zawh zia hi a sawi theih na apiang ah ka sawi fo ania. Khawngaihin heng mizia hi ropui tak tak te hi thlak ngai reng reng suh ang che u."

                Chau tih hriat tak hian a han thaw leh halh a, "Ka lei ro hlu ber ka fate, ka tana in hlutzia ka hrilh fo thin lo che u hi ka inthiam thei ngai dawn lo a nih hi."

                Pindan chu a reh thiap a, nichin lawka pindan lehlama naupang infiam thawm te chu hriat tur a awm tawh lo. Ni tla turin pindan chhung a rawn chhun en ut te pawh chu, tunah chuan a thim ta thap mai. Putar-a chu a han hawi kual vel a, chu pindan thim tak, a bang te chu ut ruam mai, mihring chenna tlak a ni ang em tih tur khawpa tla bal leh khi deuh ter tuar toh chu a han en kual a. Bungrua tia sawi tlak pawh awm mang loh na pindan a, khum chhe fahran a Putar mu chuan, "Ka lo thleng tep e, ka duh aiin ka lo haw har a ni si a."

                Putar-a chu a kal ta, chu pindan khawhar chu a reh leh zual ta raih mai. A bang awng atanga thli rawn thaw chuan Putar-a kut  a chanchinbu chu chhuat ah chuan a rawn chhem thla a.

                Chu chanchinbu ah chuan heti hian a lo inziak a, "January 20, 1990 - Zanlaiah khan Pu Muanpuia In, Electric Veng a mi chu a chhan hriatloh in a kang chhe hneh hle. Fire Department leh vengchhung tlawmngai te theihtawp chhuaha an beih ngial hnu ah an thelh thei hram. Kangmei chhuah lai hian Pu Muanpuia chu a hna thil avangin a zin lai a ni a. Amaherawh chu, vanduaithlak takin a fa pathum, Lalrinmawia (22), Lalnunsangi (18) leh Lalmalsawma (15) te chu an boral hlauh mai. Kangmei chhuah chhan hi he thu chhuah lai hian hriatchian a la ni lo a. He kangmei chhuak chungchangah hian......"