Sipai Pakhat Leh Lehkhaden

North African Campaign lai vel khan sipai rual khat, tleirawl te te hi kein an zin veivak a. Khaw te takte pakhat an lo thleng a. A tuk chu Pathianni a ni a, tleirawl thenkhat te chu Biak In-ah an inkhawm ve a. Biak In-a inkhawm te chu Sergeant (Belthum bel kan tih ang vel) pakhatin a hova. Chaplain-in tawngtaina hun a han hman zawh chuan tawngtai dan chu zir tur a ni a. Tawngtai dan lehkhabu nei te chuan an phawrh sap sap a. Mahse sipai tleirawl pakhat chuan lehkhaden chauh hi a phawrh chhuak ve a, chu chu a kut chuan a han tipharh ve a. Sergeant-in a lo hmuh chuan, "Nauva, lehkhaden kha dah rawh!" a ti nghal a.

Inkhawm ban velah chu sipai chu an man nghal a, an hotupa, Marshal hnenah an hruai a. Marshal chuan Sergeant hnenah chuan, " Sergeant, eng vangin nge he tlangval hi i rawn hruai a?" a lo ti a.

"Biak In chhungah lehkhaden a ken avangin, Ka pa."

"Ka fapa, a nih eng thiamthu nge sawi tur i neih ve?"

Chu sipai tleirawl chuan, "Tamtak," a ti a.

Marshal chuan, " A dik ka beisei. A chhan chu, sawi tur i neih loh vaih chuan midang ka hrem tawh zawng zawng aia nain ka hrem dawn che a nia." a ti leh a.

Chu tleirawl chuan, " Ka pu, ni ruk chhung zet kein kan kal tawh a; Bible emaw, tawngtai dan lehkhabu emaw ka keng lova. Mashe, ka thil tum thianghlimzia i hriat chuan mi i ngaihthiam ngei ka beisei tlat a ni..." tiin a chanchin sawi tur chu a sawi ta a.

" Ka Pu, ka lehkhaden MAL ka han hmuh hian Pathian pakhat chauh a awm a ni tih ka hrechhuak thin. ZATHNIH hian Bible hi bu hnih - Thuthlung Hlui leh Thuthlung Thar Bu-ah threndarh a ni tih min hrilh thin. ZATTHUM ka hmuh hian Pa leh Fapa leh Thlarau Thianghlim mi ngaihtuahtir thin. ZATLI ka hmuh hian Pathian thu thianghlim puangdarhtu Pathianthu hriltu hmingthang leh ropui pali - Mathaia, Marka, Luka leh Johana te kha min hriatchhuahtir thin. ZATNGA ka hmuh hian nula thianghlim panga khawnvar haltute kha ka hrechhuak thin. Nula sawm zinga panga kha an fing a, chhanchhuah an ni a; a dang panga te kha an at avangin chhandam an ni ve ta lo a nih kha.

" ZATRUK ka hmuh hian ni ruk chhungin Pathianin van leh khawvel ropui tak kha a siam zo tih ka hrechhuak a. ZATSARIH hian a ni sarih ni khan Pathian chu a hahchawl a, ni thianghlim a vuah tih min hriattir thin. ZATRIAT ka en hian Pathianin khawvel a tihchhiat laia mi tha pariat a chhanchhuahte kha ka hre chhuak thin. Nova leh a nupui, an fa pathumte leh an nupuite an nih kha. ZATKUA ka hmuh chang hian chhandamtu'n phar pakua a tihdam kha min ti-hre thin. Phar sawm zinga pakua kha chuan ngaihtuah pawh an ngaihtuah zui lo a nih kha.

" ZATSAWM ka hmuh chang hi chuan Pathian Thupek Sawmte kha ka hrechhuak thin. Thupek Sawm, lunga ziah, Pathianin Mosia hnena a hlan kha. LAL (KING) ka hmuh hian maw ka pu, van Lalpa pakhat chauh, Pathian chaka chu a awm tih ka hre thin. LALNU (QUEEN) ka en chang hian NULA thianghlim vannei Mari kha ka hrechhuak thin. JACK ka hmuh hi chuan ramhuai Setana kha hrechhuak thin.

" Lehkhadena a ZAT zawng zawng leh Jocker belhkhawm hi 365, kum khata ni awm zat chiah a ni tih ka hria. Ka lehkhaden hi 52 chiah a ni a, chu chu kum khata chawlhkar awm zat chiah a ni bawk. Lehkhadenah hian milem chuang 12 chiah a awm a, chu chu kum khata thla awm zat chiah a ni. Lehkhadenah hian chi li - Tawka, Zum, Tial leh Ak a awm a, chu chu thla khata chawlhkar awm zat chiah a ni bawk.

" Tichuan maw, Ka Pu, ka lehkhaden hi ka tan chuan BIBLE ang chauh pawh ni lovin, ka tawngtaina lehkhabu a ni bawk asin."