Hringtu Kut

A kut chu a phawkphawhraw-in a chak pawh a chak hle a. Thingtang lian tak tak pawh hi awlsam tein a elh tliak zung zung thei a, bawng kawlh tak mai pawh hi a chelh khawng tlat zo va. Thing lian tak tak pawh awlsam tak leh ngil takin a thingzainain a zai phel thiam a, a kut chu hna rothap leh sehhel tak tak thawh nan a hmang thiam em em a ni. Chung zawng ai pawha ka theihnghilh theih loh tur chu a kut lum nuam taka min han kaihkuah a, keimah chen leka kun hniam chunga vanlaizawla muvanlai dir ngar ngar mai min han kawhhmuh chang te, ral leh lam thingzara thehlei nupa inchhai zar zar lai min kawhhmuh chang te chu a ni mah zawk. A kut chu thil pakhat tih chauh lovah chuan a thil duhzawng dang thawh nan a hmang thiam em em a ni; mahse ziak a thiam tlat lo!

Sikulah pawl hniam ber atang chuan a zir tan ve ngei tak a. Chutia a zir lai chuan a zirlai a thiam loh thawi damna chu a kutphaha talhfiak hnu-hma sawm vel zet lang kalh mai chu a ni deuh ber. Eng vang kher emaw ni, a kum-ruk-thluak-burah chuan thu leh hla lam chu a leng ve tlat lo! Zirna lamah rualban zawh lohna engemaw riau a nei pawh a ni mahna. Thla engemaw zat a han kal ve lauh lauh hnuah chuan a pa (Ka Pu) chuan sikul atang chuan a la chhuak a, in lamah mipa hna thawk turin a zirtir ta zawk a ni.

Beihzui zelna:

Kum engemaw zat hnu-ah chuan a nupuiin ziak leh chhiar chu a han zirtir ve leh lauh lauh a. Chumi hnu-ah kei ka lo changkan ve deuhvah chuan a kut hrawl tak mai chu dawmin a hming ziaksa chu bahlah takin ka chhuipui thin a. Chutianga hrehawm tuar tur chuan a inpe tak na a, rei vak lovah chuan a awm hle hle thei lo va, ning hmelpu tak hian chawlh riha ke-a tei vel mai mai a duh rih thu a sawi leh mai thin.

Zan khat chu kan muhil vek tawh emaw tiin ka sikul kai ipte-a ka zirtirhbu chu a la chhuak a, dawhkanah chuan a pharh sauh sauh va, rei ngial mai a bih ta a. Nakinah chuan a harsa ti lutuk mangang chuan dawhkan chunga lehkhabu chu a bawh thlawp a, "Lalpa... naupang lehkhabu takngial pawh maw..?!" tiin a tap ta zawih zawih mai a ni. Chuta tang chuan eng anga nasa pawhin thlem mah ila pen leh lehkhabu chu a vuan leh duh ta lo reng reng a ni.

Kan farm ah chuan hna a thawk a, pawn lamah In sakna hmun ilovah te, thilsiamna hmunah te a thawk chho zel a. Chung a hna thawhna kawng tinrengah chuan a kut chu a hmang tangkai em em zel a. A rilru a thain a fim a, hna thawh nuam a tihna lah chu han dai mai mai chi a ni si lo. Indopui Pahnihna a lo chhuah khan lawng chhunga tuidawt ilo vuahtu hna a thawk a. Indo lawng tha leh khirhkhan tak tak maiah te pawh chuan bahlahna nei miah lovin a thawk thei zel a. A hna a thiam em avang leh amah a fel em avang chuan 'line boss' ni turin an han ruat dawn a, mahse ziak leh chhiar a thiamna an han endik ta a le... lawng chhunga tuidawt kal kawi dan zawng zawng chu a lem atang chuan a kut chuan a chhui zung zung thiam a, a rilru-in a inzam ki-kawi dan zawng zawng a hre fai vek a, mahse... ziak leh chhiar a thiam tlat lo alawm!!

Lawng siamna hmun an han khar tak hnu-ah chuan puan dehna khawlpui lamah a thawkzui leh ta mai a. Chumi hmunah chuan zan rei tak tak thlenga thawkin an in leh lo chu a tungding hram hram a. Chu a thawhna hmun an han khar leh tak hnu-ah chuan inhlawhna tur zawngin tuk tin hian a fehchhuak ve thin a. Zanah thim hnu-ah te a lo haw leh a, zanriah tur buatsaihtu ka nu hnenah chuan miin hna thawktu tur an zawnin a hna a thiam tk tak leh thiam tak tak loh aia ziak leh chhiar a thiam leh thiam loh an ngaih pawimawh zawk zel thu-ah chuan a vui thu a thlen thin a ni.

Mi hmaah a han interview ve a, a hming ziak aiah 'X' chhinchhiahna a han thai ve thin lai chu a tan chuan thil tawrh hreawm tak mai a ni. Mahse a tawrhhlelhawm ber zawk chu a tana miin a hming an lo ziahsak zawna a 'chhinchhiahna' a han thai ve hnu-a a in leh lo, a duat ngawih ngawih chungchanga intiamkamna thu ziak kenga midang an kalsawn lai thlir liam chu a ni awm e. Tukverh-ah a dak vung vung a, a kuta pen a hum a han let kual vel a.. Tukverh-ah a dak taknain a piah tlangram hring dup mai te chu a hmu lo reng reng tih a hriat mai. Chumi ni chawhnu chu ka tap tluanchhuak zak a ni mai.

A tawpa tawpah chuan la dehna khawlpui hmun dangah hna a hmu leh hlauh mai a, chumi khawla thawkte awmkhawmna khua-ah chuan kan pem ta a. Chumi hnuah chuan ka pa rilru chu a hnam-bet tak tak thei lo va. A hmel eng te chu a lo thim zo a, a biang te pawh chu a lo ki ve tan der mai. Mahse a kut erawh chu a la chak tha hle tho va. A kut lum nuam tak chuan min pawm a, a malchungah chuan min thuttir a, Bible thu changte min chhiartir a. Ziak leh chhiar ka thiam avang chuan mi a chhuang hle a, ka thu chhiar chu rei tak chhing a ngaithla thin a ni.

Tum khat chu radio-a Pathian thu sawitu pakhatin Bible thu, "Mipa tupawh mahni nupui fanaute chawm zo lo chu rukru aiin a tenawm zawk a, vanrama lut ve tlak a nilo," ti-a a sawi chhan chu a lo hria a. Chumi lai chang chu chhiarsak turin vawi tam tak mi a ngen thin a; mahse chulai chang kher chu ka hmu zo lo a ni. Chokaa kan chaw-ei dawhkan bulah chuan a thu a, a thu hriat duh lai chang chu mak taka keu chhuak mai tura inbeisei ni awm tak hian Bible chu a keu a keu mai thin a, a chang leh rei tak tak hi a melh vung vung thin a. Ziak leh chhiar a thiam loh avang chuan Pathianin vanramah a luh ve a phal dawn nge dawn lo tih a ngaihtuah buai thin a ni tih chu ka rin-hriat thei mai thin.

Vawi khat chu ka nuin a laizawnnu tlawh tura min zin bosan hlanin ka pa chu dawrah a lo va kal a, hna thawka ka lo vir buai hle lai chuan a lo haw leh a. Zanriah kan ei kham hnu-ah chuan chaw ei khama ei tur chi thil engemaw min rawn hawnsak thu a sawi pah chuan choka-ah a va lut a, eng "tin" emaw a hawn thawm chu ka hre thei a. Chutah a reh vang vang mai a. Choka lamah chuan ka va phei ve a, kawngka-a ding chung chuan ka va en a. Ka pa chu tui dehna bulah chuan eng 'tin' emaw ni hawnsa hi kengin a lo ding a, beidawng leh zak hmelpu zet hian a thil ken chu a lo en reng mai a. "A lemah chuan 'pear' thei a ang hle si a..." a ti nuah nuah a. Pawnah a chhuak a, kan in kailawnah chuan a va thu ta hnawk a. A fapaa mit hmuh ngeiah amah leh amah chu hrilhhai em emin a insiam a ni tih chu ka hre thiam mai. A 'tin' tuamnaah chuan, 'Alu Var chi' tih hi a inziak a, mahse a lem chuan 'pear' thei lem chu a ang ngiang reng a ni.

A bulah chuan ka thu a, arsi chi hrang hrangte chu min kawhhmuh turin ka va ngen a. Arsi chi hrang hrang leh an awmnate chu tam tak a hria a, atirah engtia lo awm nge a nih tih te chu kan sawizui ta zel a. Chumi ni-a a 'tin' lei chu chhuarah a dah tha a,a thu inziak chuan ziak leh chhiar zir a duhtir leh mai dawn emaw tih hial khawpin chu 'tin-a' thu inziakte chu a bel zing hle a ni.

Kum tam tak a ral leh hnu-ah chuan ka nu pawh chuan min lo thihsan ve ta a; kei pawh nupui fanau neiin in hrang ka lo chang ve hman tawh a. Ka pa chu kan hnena lo cheng turin ka thlem ta a, mahse ka thlem thlu zo lo. Chu ina chena ran tlem azawng leh huan thlai te enkawl chu a duh zawk avangin ka sawmna chu mi a hnial fithla a ni. A hriselna lah chu a lo rawih tial tial a, vawi tam tak damdawiina dah luh a ngai a. Kan chhungkaw thian, Doctor Green-a chuan chutia a lo chak lo tial tial chu hriain damdawi chi thar a chawh a, chung a damdawi chawh zingah chuan lungphu a dik lo dawna a hriat veleha ei tur, nitroglycerine mum a pe tel bawk a.

Ka pa damlai hmel ka hmuh tawpna chu ka fate pahnih kaihkuah chunga kan in bul dil kam phaitual hnima a kal chu a ni ta mai! Kum tam tak liam tawha kan pafaa kan lo chenna leh nghakuai te kan lo chiah dun thinna, kan in bul dil vel chu a kut hrawlpui mai, tuna a lo upat tak avanga a kut chang pawh bawl thlek thluk tawh chuan a kawk kual vel a. Chumi zan la la chuan ka hna thar zawm turin tuipuiral rama kan chenna tur hmun pan chuan thlawhtheihnain kan thlawkchhuak ta nghal a. Chumi hnu chawlhkar thum a ral chuan ka pa chu lungphu chawlin a thi a ta a ni.

A vuinaa tel turin keimah chauhin kan khaw hluiah chuan ka va kal a. Doctor Green-a chuan ka pa thih chungchanga pawi a tihzia thu min lo hrilh vat a. A dik tak chuan ka pa thih avang khan a rilru a hah a ni zawk, a chhan pawh a thih hma lawk khan a damdawi chawh hmasa kha thlaksakin nitroglycerine chi thar a chawh a, chu a damdawi chawh chu dawmdawi enkawltu chuan a pechhuak ngei a, mahse chu damdawi emaw, a bur emaw pawh chu ka pa bul hnaiah chuan an hmu zo miah lo a ni awm e. Chu damdawi chu a ei hman phawt chuan tanpuitu a zawn chhung tal a nunna chu a chelhzui thei dawn niin Doctor chuan a ring a ni.

Biak Ina ka pa vuina inkhawm neih nan darkar khat vel hun a la awm tih-ah chuan ka pa huan ngaihnat em em mai ah chuan ka lut a. A huan kil sir khat, thenawmten a ruang an chharna hmunah chuan ka kal a. Rilru lungngai tak chung chuan mi ropui tak maiin a nunna a thlahna hmun lei chu ka kut chuan ka thai phut vel a. Ngaihtuah mang lo chuan chulaia leirawhchan inphum deuh ti-tih chu ka han kuai thal a; a hnuaiah chuan plastic bur elh sawih deuh bai mai, la keh lo, lung emaw-a chhut chawrh chawrh hnu ni awm tak hi a lo awm reng mai a.

Chu nitroglycerine bur ka han lek kan vel lai chuan a chhin hawn tuma ka pain harsa ti tak chunga a bei vel lai awm tur chu ka mitthlaah chuan a lo lang uar uar mai a. Rilru chhungril na ngawih ngawih chung chuan eng vanga a kut hrawlpui maia chu bur chu hawn tuma a beih fe hnu pawha hawng thei lo va thihpui ta nge a nih tih chu ka hrethiam ta uar uar mai! A bur chhinah chuan, "Nem thla la, herh rawh" tih hi a lo inziak kalh mai a. A hnu-ah damdawi siamtu chuan naupangte hriat thiam loh tur damdawi bur chhin chi thar a hman thu a sawi nghe nghe a ni. Ka pa chuan chutiang thu inziak chu a chhiar thiam ve toh si lo!

Patling tih awm chi a ni lo tih chu ka hrereng a, mahse khua-ah ka kal nghal vat a, ipte-a ah chi dictionary leh rangkachak tui luan 'pen' hi ka va lei a. Ka pa thlah liam nan chuan a kutphah hrawl tak mai, hmangaihna pangti luma khat thin, nung sarh mai thin, mahse ziak rawh thiam lo, tuna lo vawt khawng ta tlat mai chungah chuan ka hmehbel ta chawt chawt a.....