Abraham Lincoln-an a fapa school Headmaster nena lehkha a thawn...

Mi zawng zawng hi an dikin an rinawm vek lo a ni tih hi a zir a ngai tih chu ka hria. Mahse misual zingah pawh mi chhuantawlawl an awm zel a; mahni hmasial tak tak politician zingah pawh hotu tur renga piang an awm thin tih hi zirtir la... hmelma zingah pawh thian an awm zel thin tih hi zirtir ang che. Hneh lotu nih thiam zirtir la... hnehtu nih thiam zirtir bawk ang che. Itsiknaa a luh loh nan kaihruai la, ri lova nui thei nihna thuruk chu zirtir ang che.

"I theih phawt chuan lehkhabu hlutzia leh ropuizia hi zirtir la... mahse chatuana danglam ngai lo - van sanga leng savate nunphung thuruk te, ni sen sa hnuaia khuai nunchan zir te, tlangram hring dup zinga pangpar mawizia te ngaihtuaha a chhut theih nan erawh hun-awl pe thin ang che.

"Sikulah chuan entawn aiin 'fail' mai chu a zahawmin chawimawi tlak a ni zawk tih hi zirtir ang che. Mi zawng zawngin dik lova an puh pawha ama ngaihdana ding ngheta mahni inringtawk turin zirtir ang che. Mi ngilneite chunga ngilnei ve turin leh mi hruanghraute chunga hruanghrau ve turin zirtir ang che. Midangte tih ang apiang zui ve zel lo tura chakna a neih theih nan ka fapa chu zirtir tum ang che. Mi tupawhin thu an sawi chu dawhthei taka ngaithla zel turin zirtir la... mahse thudik thlitfimna hmanga chu'ng a thu hriatte chu thlifim a, a zawm tlak chauh zawm turin zirtir bawk ang che.

"I theih chuan lungngaih lai ber pawha nui thei turin zirtir la... mittui tihtlak hi a mualphothlak loh tih hi zirtir bawk ang che. Kherkhiapna hmusit turin zirtir la, fel lutukna laka fimkhur turin zirtir bawk ang che. A finna leh a thahrui chu ngam sang bertu hnena hralh turin zirtir la, mahse a thinlung leh a thlarau chu tu hnen maha hralh ngai hlek lo turin zirtir ang che. Thu lawilo leng vak laka a beng chhu ngawng turin zirtir la.... dik ni-a a inhriatnaah chuan ding nghet a, do ngam turin zirtir ang che.

"Ngilnei takin enkawl la, mahse duat suh ang che; a chhan chu mei sa lutuk kaltlang lo chuan kahpathir hi a chhuak thei ngai lo. Dawhtheilo tura huaisenna neihtir la...huaisen tura dawhtheihna neihtir ang che. Mi dangte rin ngamna zahawm tak nei reng turin zirtir ang che."